ယောဂကျင့်စဉ်က နှလုံးအားနည်းရောဂါသည်တွေရဲ့ ဘဝအရည်အသွေးကို တိုးတက်စေနိုင်
11:20 AM 12 Nov, 2026
အိန္ဒိယနိုင်ငံရှိ ဆေးဘက်ဆိုင်ရာစင်တာ ၁၆ ခုမှာ နှလုံးအားနည်းရောဂါ ခံစားနေရသူ လူနာ ၃,၅၀၀ နီးပါး ပါဝင်တဲ့ လေ့လာမှုကြီးတစ်ခုအရ ယောဂကျင့်စဉ်ဟာ လူနာတွေရဲ့ ဘဝအရည်အသွေးနဲ့ ကိုယ်လက်လှုပ်ရှားနိုင်စွမ်းကို တိုးတက်စေနိုင်ကြောင်း တွေ့ရှိခဲ့ပါတယ်။ ဒါပေမဲ့ သေဆုံးမှု၊ ဆေးရုံတက်ရောက်ကုသရမှုနဲ့ လေဖြတ်မှုတွေကိုတော့ သိသိသာသာ လျှော့ချနိုင်ခြင်း မရှိခဲ့ပါဘူး။
အဆိုပါလေ့လာမှုရလဒ်ကို American Heart Association ရဲ့ သိပ္ပံဆိုင်ရာညီလာခံမှာ တင်ပြခဲ့တာဖြစ်ပါတယ်။ သုတေသီတွေက ယောဂလေ့ကျင့်ခန်းအစီအစဉ်ဟာ အိန္ဒိယနိုင်ငံမှာ အလွယ်တကူမရရှိနိုင်တဲ့ အထူးပြုနှလုံးပြန်လည်သန်စွမ်းရေးကုသမှုအတွက် ကုန်ကျစရိတ်သက်သာတဲ့ အစားထိုးနည်းလမ်းတစ်ခု ဖြစ်လာနိုင်ကြောင်း ပြောကြားခဲ့ပါတယ်။ အိန္ဒိယနိုင်ငံမှာ အဆိုပါကုသမှုကို ပေးနိုင်တဲ့ ကျန်းမာရေးဌာနတွေဟာ ၅ ရာခိုင်နှုန်းကနေ ၁၀ ရာခိုင်နှုန်းခန့်သာ ရှိပါတယ်။
လေ့လာမှုမှာ ပါဝင်သူတွေကို အုပ်စု ၂ စုအဖြစ် ကျပန်းခွဲဝေခဲ့ပါတယ်။ ပထမအုပ်စုကို စနစ်တကျစီစဉ်ထားတဲ့ ယောဂကျင့်စဉ်တွေ ပြုလုပ်စေခဲ့ပြီး ဒုတိယအုပ်စုကိုတော့ ပုံမှန်ဆေးကုသမှုနဲ့ ကျန်းမာရေးပညာပေးမှုတွေ ပေးခဲ့ပါတယ်။ ၃ လကြာပြီးနောက် ယောဂကျင့်စဉ်ပြုလုပ်ခဲ့တဲ့ အုပ်စုမှာ ဘဝအရည်အသွေးနဲ့ ကိုယ်လက်လှုပ်ရှားနိုင်စွမ်း သိသိသာသာ တိုးတက်လာခဲ့ပါတယ်။
၆ မိနစ်ကြာ လမ်းလျှောက်စမ်းသပ်မှုမှာ ယောဂကျင့်စဉ်ပြုလုပ်ခဲ့တဲ့ လူနာတွေဟာ ပုံမှန်ကုသမှုခံယူတဲ့ အုပ်စုထက် ပျမ်းမျှ ၂၅.၅ မီတာ ပိုမိုလမ်းလျှောက်နိုင်ခဲ့ပါတယ်။ ဒါ့အပြင် ကိုယ်ခန္ဓာအားနည်းချည့်နဲ့မှုနဲ့ နေထိုင်မှုပုံစံဆိုင်ရာ အလေ့အကျင့်တွေမှာလည်း တိုးတက်မှုတွေ ရှိခဲ့ကြောင်း သုတေသီတွေက ပြောပါတယ်။
ဒါပေမဲ့ သေဆုံးမှု၊ ဆေးရုံတက်ရောက်ကုသရမှုနဲ့ လေဖြတ်မှုတို့ကို ပေါင်းစပ်တွက်ချက်ရာမှာ ယောဂအုပ်စုက ၂၁ ရာခိုင်နှုန်းရှိခဲ့ပြီး ပုံမှန်ကုသမှုခံယူတဲ့ အုပ်စုမှာတော့ ၂၂.၈ ရာခိုင်နှုန်း ရှိခဲ့ပါတယ်။ အုပ်စုနှစ်ခုကြား ကွာခြားချက်ဟာ စာရင်းအင်းဆိုင်ရာအရ သိသာထင်ရှားမှု မရှိခဲ့ပါဘူး။
ယောဂလေ့ကျင့်ရေးအစီအစဉ်မှာ ၃ လအတွင်း လူကိုယ်တိုင်နဲ့ အွန်လိုင်းကနေ ပြုလုပ်တဲ့ လေ့ကျင့်ခန်းသင်တန်း အကြိမ် ၂၀ ပါဝင်ခဲ့ပါတယ်။ ဒါ့အပြင် လူနာတွေကို အိမ်မှာလည်း နေ့စဉ် မိနစ် ၅၀ မှ ၅၅ မိနစ်အထိ ယောဂဆက်လက်ကျင့်သုံးဖို့ အကြံပြုထားပါတယ်။
အဆိုပါလေ့လာမှုဟာ အိန္ဒိယနိုင်ငံအတွက် အထူးအရေးကြီးကြောင်း သုတေသီတွေက ပြောကြားခဲ့ပါတယ်။ အိန္ဒိယနိုင်ငံမှာ နှလုံးအားနည်းရောဂါ ခံစားနေရသူ ၈ သန်းမှ ၁၀ သန်းခန့် ရှိနေပြီး နှစ်စဉ် လူနာအသစ် ၁.၈ သန်းခန့် တွေ့ရှိနေရပါတယ်။ ဒါ့အပြင် လူနာအများအပြားဟာ အထူးပြုနှလုံးပြန်လည်သန်စွမ်းရေး ကုသမှုဝန်ဆောင်မှုတွေကို လက်လှမ်းမီဖို့ အခက်အခဲရှိနေကြပါတယ်။
အဆိုပါသုတေသနကို Indian Council of Medical Research နဲ့ ဗြိတိန်၊ အမေရိကန်နိုင်ငံတို့ရှိ အဖွဲ့အစည်းတွေက ရန်ပုံငွေထောက်ပံ့ခဲ့တာ ဖြစ်ပါတယ်။ သုတေသီတွေက ယောဂကျင့်စဉ်ဟာ နှလုံးပြန်လည်သန်စွမ်းရေးကုသမှုကို လူနာတွေအတွက် ပိုမိုလက်လှမ်းမီစေနိုင်ပေမယ့် သေဆုံးမှုနဲ့ ဆေးရုံတက်ရောက်ကုသရမှုတွေကို လျှော့ချနိုင်တဲ့ သက်သေပြပြီးသား နည်းလမ်းတစ်ခုအဖြစ်တော့ မသတ်မှတ်သင့်သေးကြောင်း ပြောကြားခဲ့ပါတယ်။